Мақомоти иҷроияи ҳокимияти давлатии ш.Бӯстон|Воскресенье, Август 19, 2018
Шумо дар саҳифаи Home » Мақомот » Мулоқоти Раҷаббой Аҳмадзода бо устодону донишҷӯёни Донишкадаи куҳӣ-металлургии Тоҷикистон дар шаҳри Бўстон

Мулоқоти Раҷаббой Аҳмадзода бо устодону донишҷӯёни Донишкадаи куҳӣ-металлургии Тоҷикистон дар шаҳри Бўстон 

3

Рӯзи 10 май Раиси вилояти Суғд Раҷаббой Аҳмадзода дар доираи чорабиниҳои як моҳи ҷавонӣ, ки ба муносибати Рӯзи ҷавонон идома дорад, бо устодону донишҷӯёни Донишкадаи куҳӣ-металлургии Тоҷикистон дар шаҳри Бўстон мулоқот намуд.

Қабл аз оғози мулоқот Раиси вилоят бо дастовардҳои устодону донишҷӯёни донишкада шинос гардид. Дар рафти мулоқот, ки дар маҷлисгоҳи донишкада ҷараён гирифт, Раиси вилоят аз дастгириҳои Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд ҷиҳати рушди соҳаи маориф ва фароҳам намудани шароити мусоид барои фаъолияти босамари аҳли илму адаб ва ихтироъкорону навоварон ёдовар шуда, таъкид кард, ки бо шарофати Истиқлолияти давлатӣ ва таҳкими сулҳу субот дар ҳамаи соҳаҳо, аз ҷумла соҳаи маориф низ пешравиҳои назаррас ба вуҷуд омадаанд.

Зикр гардид, ки Донишкадаи куҳӣ-металлургии Тоҷикистон дар шаҳри Бўстон маҳз бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри рушди соҳаи саноати куҳӣ-металлургӣ, тайёр кардани мутахассисони соҳа ва таъмини корхонаҳои куҳӣ-металлургӣ бо мутахассисон ташкил гардида, хатмкунандагони ин боргоҳи таълимӣ дар корхонаҳои металлургии вилоят кору фаъолият доранд.

Бо дастгирии Ҳукумати ҷумҳурӣ, Мақомоти иҷроияи ҳокимияти давлатии вилояти Суғд, Вазорати саноат ва технологияҳои нав ва Вазорати маориф ва илми Ҷумҳурии Тоҷикистон пояи моддӣ-техникии таълимгоҳ сол ба сол мустаҳкам гардида истодааст.  Масалан, дар соли таъсисёбии донишкада танҳо 1 бинои таълимӣ фаъолият мебурд, ҳоло бошад шумораи биноҳои таълимӣ ба 4 адад расонида шуд. Дар ҳоли ҳозир донишкада дорои хобгоҳи замонавӣ, 27 озмоишгоҳу ташхисгоҳҳои таълимӣ ва илмӣ-тадқиқотӣ, майдончаҳои таълимӣ-таҷрибавӣ, китобхонаи марказӣ ва электронӣ, осорхонаи геологӣ, варзишгоҳу толори варзишӣ, синфхонаҳои лингафонӣ, мудофиаи шаҳрвандӣ, 6 синфхонаи компутерӣ, маркази ташхиси компутерӣ, 300 компютер, 30 тахтаи электронӣ ва проектор мебошад.

Таҳлилҳо нишон медиҳанд, ки дар тўли 12 соли фаъолият беш аз 2500 нафар донишҷўён ин боргоҳи маърифатро хатм намуда, айни замон дар корхонаҳои соҳаи саноати куҳӣ-металлургии ҷумҳурӣ кору фаъолият намуда истодаанд.

Раҷаббой Аҳмадзода бо назардошти шароити кунунии авзои сиёсии ҷаҳон ва тағйиру таҳаввулоти босуръати он, инчунин торафт вусъат гирифтани низоъҳои байнимазҳабӣ ва авҷи ҷиноятҳои муташаккили фаромарзӣ аз донишҷӯён даъват намуд, ки зиракии сиёсиро аз даст надиҳанд ва бо баҳои хубу аъло таҳсил карда, дар рушди соҳаи саноати куҳӣ-металлургӣ ва энергетика, ки соҳаҳои фоидаовари хоҷагии халқ мебошанд, саҳмгузор бошанд. Зеро бо ташаббуси Ҳукумати Ҷумҳурии Тоҷикистон дар мамлакат корхонаҳои коркарди маъдан ва металлургӣ сохта ба истифода дода шуда истодаанд ва табиист, ки корхонаҳои навтаъсис ба мутахассисони лаёқатманд ниёз доранд. Изҳори умед карда шуд, ки донишкада минбаъд низ дар омодасозии мутахассисони дар бозори меҳнат рақобатпазир саҳми арзанда мегузорад.

Дар идомаи мулоқот чанде аз донишҷӯён сухан гуфта, таклифу пешниҳодҳои худро ба Раиси вилоят расониданд. Сипас, аз ҷониби Раиси вилоят ба 20 донишҷӯйи фаъоли донишкада туҳфаҳои молиявӣ тақдим карда шуд.

Дар қисмати фарҳангии чорабинӣ барномаи консертии донишҷӯёни донишкада пешниҳод гардид.

Шарҳ диҳед