Мақомоти иҷроияи ҳокимияти давлатии ш.Бӯстон|Пятница, Ноябрь 22, 2019
Шумо дар саҳифаи Home » Мақомот » Забонро аз душманон ҳифз менамоем

Забонро аз душманон ҳифз менамоем 

Забон неъмати бебаҳои зиндагии аҳли башар мебошад. Инсон танҳо тавассути забон метавонад эҳсос ва фикру андешаҳои худро иброз намояд.
Забони модарии мо барои мо мисли як хазина ва бойигарӣ аст, ки қулфу калиди оне дар дили мо ҷойгир аст. Яъне соҳиби ин ганҷина худи моем ва ҳеҷ кас онро аз мо гирифта наметавонад.
Забони миллӣ ойинаи пурҷилои таърих, ҷаҳони маънавӣ ва хираду маърифати ҳар як халқу миллат ба шумор меравад. Гузашта аз ин, дар фарҳангу тамаддуни халқу миллатҳо аз ҷумла мо – тоҷикон забони модарӣ зербинои ҳуввияти миллӣ ва омили асосии ҳифзи он мебошад.
Забони модарии мо забони ширину шево ва шоиронаи тоҷикӣ, ки донишу маърифати дар тӯли ҳазорсолаҳо андӯхтаи мардумро дар худ нигоҳ доштааст, гӯётарин далели ҳастӣ ва мақоми ҳаётбахши он дар сарнавишти таърихии миллати мо ба ҳисоб меравад.
Яъне миллати шарафманди тоҷик таъриху фарҳанги беназири худро бо ҳамин забон иншо ва ба ҷаҳониён муаррифӣ кардааст.
Забони тоҷикӣ дар шумули қадимтарин забонҳои Хуросону Мовароунаҳр меросбари забонҳои бостонии ориёист.
Бинобар ин, ба ҳамватанону дӯстдорони забони тоҷикӣ муроҷиат карда, таъкид менамоям, ки барои омӯзишу таҳқиқи таърихи забон ҳарчи бештар талош намуда, ҷиҳати омода кардани мутахассисони таърихи забон, бахусус донандагони забонҳои қадима, инчунин шевашиносону хатшиносон чораҷӯйӣ намоем, то ки дар асоси калимаву ибораҳои зебову шевои бостонӣ нуқсу камбудиҳои забони имрӯзаамонро бартараф сохта, онро боз ҳам ғанӣ гардонем.
Имрӯз аҳли олам моро бо номи «тоҷикон» давлатамонро бо номи «Тоҷикистон» ва забонамонро бо номи «забони тоҷикӣ» мешиносанду эътироф мекунанд.
Қавле маъруф аст, ки омӯзиши забони модарӣ тамоми умр идома меёбад. Ин бар он маъност, ки забони модариро ҳар чӣ бештару амиқтар бояд донист. Донистани ҳар забони хориҷӣ шарафмандию тавоноӣ маҳсуб меёбад, аммо хуб донистани забони модарӣ амри виҷдон аст, ифтихори миллист.
Обрӯю эътиборе, ки мо дорем, аз забони модарии мост. Забони модарӣ барои мо мисли оина аст, ки хислату одоби миро нишон медиҳад.
Бинобар ин, мо аҳли илму маърифат андешаи бадхоҳони миллатро дар мавриди гузариш аз хати крилӣ ба хати форсӣ шадидан маҳкум менамоем.
Алиева Ш.М.,
омӯзгори фанни забони
давлатии гимназияи №1

Шарҳ диҳед